Fatih Kanlıbıçak (Fehman Mîrxan)

Fatih Kanlıbıçak (Fehman Mîrxan)

Yazarın Tüm Yazıları >

Qedero Sîya

A+A-

Behrooo!... Ê çimê to yê salî bi lepandê mi kewtaye!... Ti fina dekewtê kamcîn qulqulike? Herga ke ma ser o azmên ame pê, ti orte ra biyê vinî. To rojên dirbeta ma darû nêkerde. To rojên dest nêeşt kulawda ma û raşt nêkerde. Kişte ser kewtişî rê tim mehneyêndê to estbi.

Hezarana serrana o ke ma yê no hal de, gamên ver şiyayiş çinî o. Ma çi rê nêşenê xetên berê sere? Ma hetanî vilikên resnenê çimê ma benê sipeyî. Çi rê vilikê ma tim qurmiçikneyênê. Firsetê ma dekewno destê kê ano ma sere ro! Çi rê nandê ma de soli çinî a? Çi rê ma rê tim tofan o. Miyaneyê ma qet dês nêazikîyêno, çi rê ma rê tim sî varayê? Çi rê pîzedê ma de nan nêmaneno?

…!?

Qesbaya ma ya ronceneyêna, gonîya ma ya ancîyêna. Ma yê roj bi roj heleyênê. Çi rê mîrdê ma ra nan nêpewjîyêno? Ma do qet nêvurîyê, pêroyê ma do jew la ra bê? Merg do key emirdê Ella a bîro, ma do key fekdê çekandê dişmenan ra bireyê û zey şarî wextê xo de bimirê? Ma do key bindestey xo pey de veradê, azadî do key ma rê tometey ra bivejîyo? No qedero sîya do key destê xo ma ra bianco? Şaşeya ma kotî de a?

…!?

Her jewê ma babetên o. Ma kiştên ra pê de dişmenîne kenê, kiştên ra birayîne kenê. Kiştên ra vanê beso, ma bindestey qebûl nêkenê, kiştên ra vanê dewlete çiyênda xirab a, ma wazenê ke miyanê ûmişî de pêro pîya biciwîyê. Na çi bêaqiley a!... Merdim dişmendê xo rê vano BIRA!...

Taynê ma çek û rextanê xo gênê û vanê ewro roja namûsî a, taynê ma heta dişmenan gênê û çim veradanê namûsdê ma. Taynê ma gan û maldê xo a kewnê lej, taynê ma xo kenê kerr, qayil ê ke bindestey ra bireyê labrey wa tehda ci nêreso; banê ci nêrijîyê, karê ci nêxeripîyo, dewê, sûkê ci xirabeyî nêbê, merdimê ci nêmirê… Ma lej kaya qeçan a!... Veyşan mendiş, dirbetin biyayiş, merdiş çinêbo lej beno!... Ma do no hal a senî bindestey ra bireyê?

Her zerejê ma sîyên de waneno!... Kesê ma zî nêzano ke o yo çi çî wazeno! Ewro waştişê ma jew bi jew ma ra pers bo çiyêndo ercîyaye do nêvejîyo orte? Halê ma no hal bo timûtim adir do bivaro ma ser o. Ellayî bilaheq nêvato “Hetanî ke qulê mi halê xo nêvurînê ez qethîn halê înan nêvurînena.”. Eke ma qayil ê qederdê xoyê sîyayî ra bireyê ganî ma nê halê xo bivurînê.

Eke winî nêbo ma do hend bişê qiseyî bikerê, hend bişê pê berê û biyarê!.... Xo ra ma yê hezar heta ewnîyênê ganî ma pêro pîya dest çekerê nê barî, qet nêbo na tepîya wa ma vila nêbê!... Eke ewro zî ma nêşê, sena serre ma do adir de biveşê.

…!?

Önceki ve Sonraki Yazılar

YAZIYA YORUM KAT

UYARI: Küfür, hakaret, rencide edici cümleler veya imalar, inançlara saldırı içeren, imla kuralları ile yazılmamış,
Türkçe karakter kullanılmayan ve büyük harflerle yazılmış yorumlar onaylanmamaktadır.
5 Yorum