Fatih Kanlıbıçak (Fehman Mîrxan)

Fatih Kanlıbıçak (Fehman Mîrxan)

Yazarın Tüm Yazıları >

Wendeyê Ma

A+A-

 

Wendeyanê ma hetanî ewro nêşayo şarê ma yê nêwendî xo dima kaş kero. Sebebêndê hendayê pey ra mendişdê ma yo jew zî no halê wendeyandê ma o.

Merdim çend kitabî waneno wa biwano, çend mektebî qedîneno wa biqedîno, eke sey kutikandê hakan doş beno-beno soyin yeno pûndê kergan, o hend wendiş, o hend mekteb şiyayiş pêro sey vervadê patoze o, çiyên rê nêbeno. İnsan zî, dewar zî nêweno.

Biewnîyê meseleyên a ez şima rê nê halê wendeyandê ma zelal kera.

Rojên mamostayêndo xeşîm û ezeb şino dewên. Dewe de şeştî-hewtay serre kalêndo tenya esto. Kal tenya o ne cinêya ci ne zî qeçê ci kes çinî o, qandê coy bol bol şino mamostayî hete de tenyayê xo bi ey a ravêrneno. Labrey herga ke yeno mamostayî rê vano:

Mamostaaa, kêfê to yo ca de ha!...

Mamosta vano: Xalo, nêweşîyênda mi çinî a, pereyê mi zî hendê mi estê, Ellayî rê hezar barî şikur.

Çend rojî tepîya xalo finna yeno: Mamostaaa, kêfê to yo ca de ha!...

Mamosta finna vano: Xalo, nêweşîyênda mi çinî a, pereyê mi zî hendê mi estê, Ellayî rê hezar barî şikur.

No babet a dades finnî xalo şino û yeno. Xalo her tim eynî çî vano mamosta zî eynî cewabî dano. Labrey ameyişê finna soyinî de eynî cewabdê mamostayê dima xalo vano: ,

Mamostaaa, eke cinî çinêbo kêf çinî o, çinî o!...

?!...

Mamosta sifte goş nêkuweno na qisada xaloyî ro. Labrey dewe de tenya o û tenyayey herga ke bena derge, bena çetineya ci zî zeydîyêna.

Rojên embazêndê ci o ke jewna dewe de mamostayey keno ey a qiseyî kerdiş de meselaya xo û xaloyî ey rê zî vano. Ser o xeylên fikirîyênê û vanê:

“Eke xalo o hendayên serran dima wina vano, heqê ci esto.” û babetên a jewjiyênê.

Çend serrî dekewno orte, jewê nînan cinîya xo tiya de veradano û qandê lîsansdê berzî şino Emerîqa. Cinî tiya de, o uca de xeylên wext ravêreno. A kişt na kişt çorşmeyê xo winêno kes sey ci çinî o.

Fehm keno ke qisada xaloyî a hereket kerdiş xeta bi labrey finnê jewjîyayo, biyo wayîrê qeç û qûlan ageyrayiş zî nêbeno.

Demeyên tepîya embazdê xo a qiseyî keno. Pê ra fehm kenê ke her didi zî haldê xo ra razî nîyê. A kişte na kişte qiseyî doş benê, yenê qisada xaloyî ser. O yo ki Emerîqa de o vano: Ma de misqalên totik çinî o.

Ma hend şî mekteb, hend kitabî wendî!… Ma finna ameyî çimdê xaloyî a winîyayî dînyayî ra… Eke ma do biameyê çimdê xaloyî a biwinîyayê dînyayî ra, ma çi rê hend şî mekteb, çi rê hend xo încirax kerd… Ma dewên de şiwaneyîne bikerdayê xo ra ma do sey xaloyî bifikirîyayê!...

Eke mabêndê wendandê ma û nêwendandê ma de ferqêndo çinêbo, ê dê soyin bîrê nêwendan dima şirê, o hend wendiş, o hend încîrax biyayiş çi çî rê o? Hend hella-hope çi çî rê a? Wa deweda xo ra nêvejîyê tever, wa xo rê biwinîyê kar û bardê xo. Wa qet sereyê xo nêtewnê, xo ra eke ê ameyî serrandê xaloyî, ê do jew bi jew sey xaloyî bê.

Wext, wextê newe biyayişî, daranê pîran birnayişî û herûnda înan de tezeyan karitişî o. Kes o ke nêşeno nê barî wedarno wa bîlaheq torzênî xo dest nêkero û nêkewo miyanê mêşeyan. Beno ke jewêndo ke do bişo nê barî wedarno yeno, wa bîlaheq ca teng nêbo.

Önceki ve Sonraki Yazılar

YAZIYA YORUM KAT

UYARI: Küfür, hakaret, rencide edici cümleler veya imalar, inançlara saldırı içeren, imla kuralları ile yazılmamış,
Türkçe karakter kullanılmayan ve büyük harflerle yazılmış yorumlar onaylanmamaktadır.